“Монголын Эдийн Засгийн Чуулган” нь Монгол Улсын эдийн засаг, нийгмийн өмнө тулгамдаж буй асуудал ба түүний шийдлийн талаар төр засаг, хувийн хэвшил, иргэний нийгэм, салбарын судлаачид, гадаадын төлөөлөгчдөөс бүрдсэн талууд өөрсдийн байр сууриа солилцож, бүтээлч хэлэлцүүлгүүдийг өрнүүлэх зорилготой чуулга уулзалт юм. “Монголын Эдийн засгийн чуулган 2022” нь Монгол Улсын Засгийн газраас зарласан “ШИНЭ СЭРГЭЛТИЙН БОДЛОГО”-ыг хэрэгжүүлэх хүрээнд зохион байгуулагдаж байгаагаараа онцлог юм.

"Ногоон хөгжлийн сэргэлт" урьдчилсан хэлэлцүүлэг 2022 оны 3 дугаар сарын 30-ны өдөр явагдаж өндөрлөсөн ба хэлэлцүүлэгт Монголын Хөрөнгийн Бирж ТӨХК-ийн Гүйцэтгэх захирал Х.Алтай оролцсон бөгөөд тэрээр хэлэхдээ “Зөвхөн олон улсын хөрөнгийн зах зээл дээр гэлтгүй дотоодын хөрөнгийн бирж дээр Засгийн газар болон Нийслэлийн зүгээс аливаа бондыг гаргахад, гаднын хөрөнгө оруулагчдыг татах том алхам юм. Тухайлбал, Нийслэлээс Монголын Хөрөнгийн бирж дээр байгаль орчинд ээлтэй нийтийн тээврийн бондыг гаргалаа гэж бодоход гаднын хөрөнгө оруулагчид дотоодын хөрөнгийн бирж дээрээс тухайн бондыг худалдан авах боломжтой” гэдгийг онцоллоо.

Урьдчилсан хэлэлцүүлгээс гарсан санал, зөвлөмжийг 2022 оны 4 дүгээр сарын 7-ны өдрөөс 8-ны өдрүүдэд болох Үндсэн хэлэлцүүлгийн үеэр хэлэлцэх юм.

МОНГОЛЫН ХӨРӨНГИЙН БИРЖ