Өнөөдөр буюу 2021 оны 11-р сарын 10-ны өдөр УИХ-ын гишүүн Н.Учрал, УИХ-ын гишүүн Э.Батшугар болон бусад төлөөлөл Монголын хөрөнгийн бирж (МХБ)-д зочилж, МХБ-ийн үйл ажиллагаатай танилцаж, хөрөнгийн зах зээлийн өнөөгийн байдал, сүүлийн үеийн ахиц дэвшлүүд, хөгжлийн боломжийн талаар санал солилцлоо. Түүнчлэн, МХБ-ийн зүгээс УИХ-аар удахгүй хэлэлцэгдэх "Виртуал хөрөнгийн үйлчилгээ үзүүлэгчийн тухай хууль"-ийн төсөл, "Үнэт цаасны зах зээлийн тухай хууль"-ийн нэмэлт өөрчлөлтийн төсөл болон татварын хууль тогтоомжийн талаарх байр суурь, саналыг гишүүдэд танилцууллаа. 

Уулзалтын үеэр УИХ-ын гишүүн Н.Учрал "Хадгаламжийн хүү буурч, хөрөнгийн хуримтлал нэмэгдэхийн хирээр иргэд хуримтлалаараа оновчтой хөрөнгө оруулалт хийх асуудал тулгамдаж байна. Хөрөнгийн зах зээлд иргэдийн оролцоог нэмэгдүүлэхийн тулд хөрөнгө оруулалтын сангуудыг нэмэгдүүлэх, суурь боловсролын сургалтын хөтөлбөрт хөрөнгийн зах зээлийн талаар болон шинэ технологи, виртуал орчны талаарх сэдвийг оруулж, иргэдийн санхүүгийн боловсролыг сайжруулах хэрэгтэй байна" хэмээн онцолсон бол УИХ-ын гишүүн Э.Батшугар "Хөрөнгийн зах зээл идэвхжиж буй энэ цаг үед хөгжлийг нь эрчимжүүлэхийн тулд нээлттэй компани болох, үнэт цаас гаргах процессийг олон улсын жишгийн дагуу илүү хялбаршуулах, шинэ технологид суурилсан үйлчилгээг хөрөнгийн зах зээлд нэмэгдүүлэх нь зүйтэй" хэмээн өөрийн байр сууриа илэрхийллээ. 

МОНГОЛЫН ХӨРӨНГИЙН БИРЖ