Эрхэм хүндэт азай буурлууд, ахмад настнууд, хөрөнгийн зах зээлийн нийт ажилтан, мэргэжилтнүүддээ XVII жарны Хотол төгс хэмээх төмөр хулгана жилийн мэндийг дэвшүүлье!

Улиран өнгөрч буй Гахай жил нь Монголын хөрөнгийн зах зээлийн хувьд амжилт дүүрэн түүхэн жил байлаа. 2019 онд “Түмэн шувуут” ХК, “Ард кредит ББСБ” ХК, “Монос хүнс” ХК, “Инвескор ББСБ” ХК-иуд  МХБ-ийн  анхдагч зах зээлийн арилжаагаар нийт  42.4 тэрбум төгрөгийг олон нийтээс амжилттай татан төвлөрүүлсэн нь анхдагч зах зээлийн арилжааны хувьд түүхэн дээд үзүүлэлт боллоо. Бид мэргэжлийн хөрөнгө оруулагчид болох хөрөнгө оруулалтын сангуудын оролцоог нэмэгдүүлэх зорилгоор "Хамтын хаалттай хөрөнгө оруулалтын сангийн нэгж эрхийн бүртгэлийн журам"-ыг боловсруулж батлав. Мөн орон нутгийн иргэдийн үнэт цаасны зах зээлийн талаарх мэдлэг, мэдээллийг дээшлүүлэх зорилгоор "Үнэт цаасны зах зээлийн нээлттэй өдөрлөг" арга хэмжээг Өвөрхангай, Баянхонгор, Говьсүмбэр, Дорноговь, Сэлэнгэ зэрэг нийт 12 аймгийн төв болон 30 сумдад амжилттай зохион байгуулж нийт 15,000 гаруй иргэдийг хамрууллаа.

Ирж байгаа төмөр Хулгана жилд та бүхний ажил үйлс өөдрөг, амжилт бүтээлээр дүүрэн байхын өлзийтэй ерөөлийг өргөн дэвшүүлье.

МОНГОЛЫН ХӨРӨНГИЙН БИРЖ