"Монголын хөрөнгийн бирж" ХК нь 2017 онд “Үнэт цаасны үнийн индекс тооцох журам”-ыг баталж, тус журмын дагуу ТОП 20, MSE A болон MSE B индексийг тооцдог байв.

Дотоодын хөрөнгийн зах зээлд шинэ төрлийн бүтээгдэхүүн нэвтрүүлэх, мэргэжлийн хөрөнгө оруулагчдын оролцоог нэмэгдүүлэх зорилгоор үнэт цаасны индексэд суурилсан биржээр арилжаалагддаг сан (ETF)-г зах зээлд нэвтрүүлж, үүний хүрээнд АНУ-ын зах зээлд бүртгэлтэй үнэт цаасанд суурилсан шинэ индекс үүсгэхээр төлөвлөсөн.

Үүнтэй холбогдуулан компанийн Төлөөлөн удирдах зөвлөлийн 2026 оны 5 дугаар сарын 6-ны өдрийн 15 дугаар тогтоолоор баталсан “Үнэт цаасны үнийн индекс тооцох журам”-ын шинэчилсэн найруулгын төсөл Санхүүгийн зохицуулах хорооны даргын 2026 оны 5 дугаар сарын 18-ны өдрийн 366 дугаар тушаалаар батламжлагдлаа.

“Үнэт цаасны индекс тооцох журам”-ын шинэчилсэн найруулгаар зөвхөн МХБ-д бүртгэлтэй хувьцаанд суурилсан индекс бус, гадаад, дотоодын зах зээлд бүртгэлтэй хувьцаа, бонд, ETF зэрэг бүх төрлийн үнэт цаасанд суурилсан индексийг шинээр үүсгэн тооцох боломж бүрдэж байна.

Энэхүү индексийн багц нь АНУ-ын биржид бүртгэлтэй ETF буюу биржээр арилжаалагддаг 17 сангаас бүрдэх бөгөөд технологи, инновац, эрчим хүч болон түүхий эдийн салбарын гүйцэтгэлийг илэрхийлнэ.

Уг хэрэгсэл зах зээлд нэвтэрснээр хөрөнгө оруулагчид дэлхийн томоохон компаниудын үр өгөөжөөс хүртэж, багцаа олон улсын түвшинд төрөлжүүлэх боломж бүрдэж байгаа ба дотоодын хөрөнгийн зах зээлийн цар хүрээ, идэвхийг нэмэгдүүлэхэд чухал ач холбогдолтой юм.

"Үнэт цаасны индекс тооцох журам"-ын шинэчилсэн найруулгатай энд дарж танилцана уу.

МОНГОЛЫН ХӨРӨНГИЙН БИРЖ