“Монголын хөрөнгийн бирж” ХК-иас “Үнэт цаасны зах зээлийн анхан шатны мэдлэг олгох ээлжит, танхимын сургалтаа 2026 оны 4 дүгээр сарын 8-10-ны өдрүүдэд зохион байгууллаа.

Энэ сарын сургалтад нийт 26 иргэн хамрагдсан бөгөөд биржийн Бизнес хөгжлийн газрын захирал Т.Хаш-Эрдэнэ суралцагчдад баяр хүргэн, амжилт хүсээд сертификатийг гардуулсан юм.

Энэ үеэр иргэн С.Дүүрэнжаргал бидэнтэй сэтгэгдлээ хуваалцсаныг хүргэж байна. Тэрээр “Би олон улсын эдийн засагч, эрх зүйч мэргэжилтэй. Оюуны өмчийн чиглэлээр ажилладаг.

Манай аав цэргийн байгууллагад ажиллаж байгаад тэтгэвэртээ гарахдаа улсаас олгодог тэтгэмжийн мөнгөөрөө хөрөнгө оруулагч болохыг зорьж 10-аад жилийн өмнө анх сургалтад хамрагдаж байсан.

Үнэт цаасны зах зээлийн анхан шатны сургалтад суусны ач тусаар одоо аав, ээж хоёр маань улиралд 7 сая төгрөгийн өгөөж хүртдэг хөрөнгө оруулагчид болсон байгааг дуулгахад баяртай байна.

Харин одоо би тэднээсээ үлгэр дуурайл авч, мөн энэ сургалтад суулаа. Сургалтын агуулга, өгөөж миний хүлээлтээс давсан гэж үнэлнэ” гэв.

МОНГОЛЫН ХӨРӨНГИЙН БИРЖ