“Монголын хөрөнгийн бирж” ХК-ийн Уул уурхайн бүтээгдэхүүний арилжаа, бүртгэлийн газраас өнөөдөр (2025.10.02) Аж үйлдвэр, эрдэс баялгийн яам, Татварын ерөнхий газар, Гаалийн төв лаборатори, “Монголын жонш олборлогч, үйлдвэрлэгч, экспортлогчдын холбоо”, баяжуулах боловсруулах үйлдвэрийн төлөөллүүдийг хамруулсан арга хэмжээг зохион байгууллаа.

“Монголын хөрөнгийн бирж” ХК-ийг төлөөлж Гүйцэтгэх захирлын үүргийг түр орлон гүйцэтгэгч Б.Дөлгөөн, Уул уурхайн бүтээгдэхүүний арилжаа, бүртгэлийн газрын захирлын үүргийг түр орлон гүйцэтгэгч С.Ариунсанаа нар оролцсон.

Тус уулзалтад төрийн эрх бүхий байгууллага болон салбарын 40 гаруй төлөөлөлд уурхайн бүтээгдэхүүний арилжааны журмуудыг танилцуулж, Засгийн газрын холбогдох тогтоол, түүний үр дүнд бий болох боломжуудын талаар мэдээлэл хүргэхийн зэрэгцээ энэ салбарт үйл ажиллагаа явуулж буй компаниуд биржээр жонш арилжаалахад тулгамдаж буй асуудал, шийдлийн талаар харилцан санал солилцлоо.

Арга хэмжээнд Аж үйлдвэр, эрдэс баялгийн яамны Уул уурхайн бодлогын газрын ахлах мэргэжилтэн Н.Амартуул, Татварын ерөнхий газрын Эрдэс баялгийн хэлтсийн дарга С.Мөнхбаатар, Татварын улсын байцаагч Б.Түвшинжаргал, Гаалийн төв лабораторийн дарга С.Цэрэнчимэд, “Монголын жонш олборлогч, үйлдвэрлэгч, экспортлогчдын холбоо”-ны тэргүүн н.Цэвэгмид нар оролцож, тус тус мэдээлэл хүргэсэн юм.

МОНГОЛЫН ХӨРӨНГИЙН БИРЖ