“Монголын хөрөнгийн бирж” ХК санаачилгаар Санхүүгийн зохицуулах хороо, Үнэт цаасны төвлөрсөн хадгаламжийн төв (ҮЦТХТ) ХХК болон Монголын үнэт цаасны арилжаа эрхлэгчдийн холбоо (МҮЦАЭХ), хамтран зохион байгуулж буй “Хөрөнгийн зах зээл ба 1072 хувьцаа” үнэт цаасны зах зээлийн нээлттэй өдөрлөг өнөөдөр (2025.09.26) Увс аймгийн Улаангом суманд зохион байгуулагдсанаар баруун бүсийн сургалт өндөрлөж байна. 

Өдөрлөгийн хүрээнд Санхүүгийн зохицуулах хорооны Үнэт цаасны газрын ахлах мэргэжилтэн Г.Наранзул "Санхүүгийн боловсрол" сэдвээр, "Монголын хөрөнгийн бирж" ХК-ийн МОНХА-ны ахлах мэргэжилтэн П.Нямдорж "Хөрөнгийн зах зээлийн үндсэн ойлголт ба 1072 хувьцаа" сэдвээр тус тус мэдээлэл хүргэлээ.

Түүнчлэн "Тулгат чандмань баян ҮЦК" ХХК иргэдэд хөрөнгө оруулалтын талаар мэдээлэл өгч хамтран ажилласан бол орон нутагт үйл ажиллагаа явуулдаг "Увс хүнс" ХК болон "Их барилга" ХК-иуд энэхүү үйл ажиллагааг дэмжин ажилласан юм.

Тус өдөрлөгөөр:

• 1072 хувьцааны бүртгэл ногдол ашиг, хэрхэн арилжаалах

• Баялгийн шударга хуваарилалтын талаар

• Цэнхэр, ягаан тасалбар болон иргэдийн эзэмшиж буй хувьцааны бүртгэл, мэдээллийг шүүж өгөх,

• Зах зээлд гарч байгаа шинэ бүтээгдэхүүн үйлчилгээг танилцуулах болон үнэт цаас гаргагчдад зөвлөгөө өгөх хөрөнгө оруулагчдыг бэлтгэх, макро эдийн засгийн өнөөгийн нөхцөл байдал сэдвийн хүрээнд оролцогчдод дэлгэрэнгүй мэдээлэл хүргэхийг зорьсон.

Энэхүү үйл ажиллагаа нь иргэд олон нийтийн санхүүгийн мэдлэгийг дээшлүүлэх, хөрөнгийн зах зээлийн талаарх ойлголтыг нэмэгдүүлэх, хөрөнгө оруулалтын ач холбогдлыг танилцуулах зорилготой.

МОНГОЛЫН ХӨРӨНГИЙН БИРЖ