“Монголын хөрөнгийн бирж” ХК Олон улсын хүүхдийн эрхийг хамгаалах өдрийг тохиолдуулан байгууллагынхаа нийт албан хаагчдын хүүхдүүдэд зориулсан баярын арга хэмжээ зохион байгуулдаг.

Өнөөдрийн (2025.05.30) арга хэмжээг биржийн “MSE hall”-д “ИРЭЭДҮЙН ХӨРӨНГӨ ОРУУЛАГЧ” сэдэвтэйгээр зохион байгуулсан ба хүндэт зочдын нэг, 2021 оны 01 дүгээр сарын 18-ны өдөр буюу биржийн 30 жилийн ойн өдөр мэндэлсэн бяцхан хөвгүүн Т.Дамдинсүрэн Гүйцэтгэх захирлын үүргийг түр орлон гүйцэтгэгч Б.Дөлгөөний хамт цан цохих ёслол үйлдлээ.

“Монголын хөрөнгийн бирж” ХК-ийн Гүйцэтгэх захирлын үүргийг түр орлон гүйцэтгэгч Б.Дөлгөөн үйл ажиллагааг нээж хэлсэн үгэндээ: “Эрхэм хүндэт зочид, хүүхэд багачууд та бүхэндээ Олон улсын хүүхдийн эрхийг хамгаалах өдрийн баярын мэнд дэвшүүлье.

Хүүхдийн эрхийг хамгаалах өдрийг Монгол Улс хуульчлан баталгаажуулсан байдаг. Энэ өдөр нь та бүгдийн баярын өдөр гэж ойлгохоос гадна эцэг эх, асран хамгаалагч, насанд хүрэгчид бидэнд өдөр тутам хүүхдийнхээ эрүүл саруул өсч бойжих, сурч боловсрох, хөгжих хамгаалагдах эрхийг хангах эрхэм үүргийг сануулдаг нэгэн онцгой өдөр юм.

Ингээд бяцхан хөөрхөн хүүхдүүд та бүгд өнөөдөр ээж аавынхаа ажлаар зочилж, баярын үйл ажиллагаандаа идэвхтэй оролцон аз жаргал, баяр хөөр дүүрэн сайхан баярлаарай” хэмээн хэллээ.

МОНГОЛЫН ХӨРӨНГИЙН БИРЖ