“Монголын хөрөнгийн бирж” ХК өнөөдөр (2025.04.03) Монголын тогтвортой санхүүгийн холбоо (ТоС Холбоо), Олон улсын санхүүгийн корпорац (ОУСК)-тай хамтран Монголын хөрөнгийн биржид бүртгэлтэй компаниудад зориулсан “Байгаль орчин, нийгэм, засаглал (БОНЗ), тогтвортой байдлын тайлагнал” сэдэвт сургалт, мэдээллийн арга хэмжээг зохион байгууллаа.

Үйл ажиллагааг нээж “Монголын хөрөнгийн бирж” ХК-ийн Үйл ажиллагааны газрын захирал И.Жавхлан:

“Монголын хөрөнгийн бирж” ХК 2022 онд Санхүүгийн зохицуулах хороо, Монголын тогтвортой санхүүгийн холбоо (ТоС Холбоо), Олон улсын санхүүгийн корпорац зэрэг байгууллагуудтай хамтран ESG буюу БОНЗ тогтвортой байдлын тайлагналын удирдамжийг баталсан. Энэхүү удирдамжийг үндэслэн биржид бүртгэлтэй хувьцаат компаниудын олон нийтэд мэдээлэл хүргэх журмыг, хавсралтаар ESG буюу БОНЗ-ын тайлагналын маягтын загварыг баталж, 2022-2024 он хүртэл тус маягтын дагуу нийт бүртгэлтэй компаниуд сайн дурын үндсэн дээр биржид тайлангаа ирүүлэн, бирж өөрийн цахим хуудсаар дамжуулан тухайн тайланг олон нийтэд хүргэж ирсэн.

2024 оны 10-р сард тус журамд өөрчлөлт орж МХБ-ийн 1-р ангилалд бүртгэлтэй компаниуд БОНЗ-ын тайланг сайн дурын үндсэн дээр биш заавал ирүүлэх үүрэг хүлээсэн. Иймд тус журмын шинэчлэлттэй холбоотойгоор өнөөдөр та бүхэнд БОНЗ-ын тайлан гаргах арга аргачлал, сайн жишиг, туршлагын талаар мэдээлэл хүргэх зорилгоор энэхүү арга хэмжээг зохион байгуулж байна.

Сүүлийн жилүүдэд хөрөнгө оруулалтын шийдвэр гаргалтад тогтвортой хөгжил, хариуцлагатай бизнесийн зарчмууд чухал, шийдвэрлэх хүчин зүйл болж байгаа нь олон улсын судалгаануудаас тодорхой харагддаг болсон.

Манай практикт Монголын хөрөнгийн биржид хандсан мэргэжлийн хөрөнгө оруулагчид “Тогтвортой хөгжлийн тайлан гаргадаг хэдэн компани байна вэ?” гэдэг асуултыг тавихын зэрэгцээ, тухайн компаниудын БОНЗ-ын тайлантай танилцах хүсэлтэй байгаагаа илэрхийлдэг.

Иймд бид энэ чиглэлээр хийгдэж буй ажлуудаа илүү сайжруулах шаардлага үүсч байна. Тухайлбал, гадаад, дотоодын хөрөнгө оруулагчдад илүү ойлгомжтой, дэлгэрэнгүй, хүртээмжтэйгээр дата мэдээллээ сайжруулж англи, монгол хэл дээр БОНЗ-ын тайлангаа хийх шаардлагатай. Энэ ажлыг “Монголын хөрөнгийн бирж” ХК, Санхүүгийн зохицуулах хороо, ТоС холбоотой хамтран хэрэгжүүлж, удахгүй нэгдсэн дата платформ ашиглалтад оруулахаар ажиллаж байна.

Үүний ач холбогдол нь: “Монголын хөрөнгийн бирж” ХК Bloomberg, Thomson Reuters зэрэг дата мэдээллийн агентлагт бүртгэлтэй компаниудын санхүүгийн тайлан, арилжааны ханш болон үйл ажиллагааны тайлан, БОНЗ-ын тайланг хүргүүлэх гэрээтэй ажилладаг. Одоогийн байдлаар эдгээрт БОНЗ-ын тайлан ороогүй явж байна. Хойшид энэ тайланг нэгтгэх, эдгээр олон улсын сувгуудаар дамжуулан мэдээлэх шаардлагатай болж байгаа юм. Ингэснээр хөрөнгийн зах зээлд дутагдаад байгаа олон улсын хөрөнгө оруулагчдыг татах үүд хаалга нээгдэх бас нэгэн боломж юм” хэмээн тус тайлангийн ач холбогдол, үр нөлөөг дүгнэн хэллээ.

Өнөөдрийн сургалтаар:

• ОУСК-ийн Дэлхийн банкны бүлгийн мэргэжилтэн Б.Батмөнх “Байгаль орчин, нийгэм, засаглал (БОНЗ)-Тогтвортой байдлын тайлагнал” сэдвээр,

• ТоС холбооны Ерөнхий менежер Д.Энхлин БОНЗ тайлагналын чиг хандлага, БОНЗ-Тогтвортой байдлын тайлагналын удирдамж, БОНЗ тайлагналд тусгадаг гол мэдээллүүдийн талаар,

• Олон улсын тогтвортой байдлын стандартын зөвлөлөөс (ISSB) гаргасан тогтвортой байдалтай холбоотой тайлагналын шаардлагуудын тухай,

• Зочин илтгэгч (TBC) БОНЗ, Тогтвортой байдлын тайлан боловсруулж, олон нийт хөрөнгө оруулагчдад ил тод болгож буй сайн туршлагаа хуваалцсан юм.

2024 онд нийт 27 компани БОНЗ-ын тайлангаа ирүүлж байсан бол, 2025 оны 04 дүгээр сарын 03-ны өдрийн байдлаар “Монголын хөрөнгийн бирж” ХК-ийн 1-р ангилалд бүртгэлтэй 26 компаниас 14 компани тус тайланг ирүүлсэн байна.

"Монголын хөрөнгийн бирж” ХК-ийн "Үнэт цаас гаргагчаас олон нийтэд хүргэх мэдээллийн журам"-ын 3.7-д "Биржийн үнэт цаасны бүртгэлийн I ангилалд бүртгэлтэй үнэт цаас гаргагч нь байгаль орчин, нийгэм, засаглал (цаашид “БОНЗ” гэх)-ын чиглэлээр тайлант хугацаанд авч хэрэгжүүлсэн арга хэмжээ, үйл ажиллагааны мэдээллийг хавсралт маягт 1-ийн дагуу гаргаж дараа жилийн 04 дүгээр сарын 30-ны өдрийн дотор ирүүлнэ. Биржийн үнэт цаасны бүртгэлийн II болон III ангилалд бүртгэлтэй үнэт цаас гаргагч нь БОНЗ-ын тайланг дээрх тогтоосон хугацаанд сайн дурын үндсэн дээр ирүүлж болно” хэмээн заасан байдаг.

Өнөөдрийн сургалтад нийт 30 компанийн 50 гаруй төлөөлөл оролцлоо.

МОНГОЛЫН ХӨРӨНГИЙН БИРЖ