Канад Улсын Торонтогийн хөрөнгийн бирж болон Монголын хөрөнгийн биржийн 2-р ангилалд бүртгэлтэй үнэт цаас гаргагч компани болох “Эрдэнэ Ресурс Девелопмент Корпорэйшн” нь нийт 17,484,662 ширхэг хувьцааг нэмж гаргах замаар 14,249,999,530 төгрөгийн санхүүжилтийг олон нийтээс татан төвлөрүүлэхээр анхдагч зах зээлийн арилжааны захиалгыг 2021 оны 10 дугаар сарын 4-ны өдрөөс өнөөдөр буюу 10 дугаар сарын 8-ны өдрийн 17 цаг хүртэл авч дууслаа. 

Тус үнэт цаасны анхдагч зах зээлийн арилжаанд 1861 иргэн, аж ахуйн нэгж оролцож, нийт  25,570,677 ширхэг буюу 20,840,101,755 төгрөгийн үнийн дүн бүхий нийт 1861 захиалга ирүүлсэн нь үнэт цаас гаргагчийн санал болгосон хэмжээнээс 46.2 хувиар давсан дүн боллоо. 

Андеррайтераас ирүүлсэн хуваарилалтын төлөвлөгөөний дагуу стратегийн хөрөнгө оруулагчдын 13,041,306 ширхэг буюу 10,628,664,390 төгрөгийн үнийн дүн  захиалгыг 100% биелүүлж, олон нийтээс ирүүлсэн нийт 4,443,356 ширхэг  буюу 3,621,335,140 төгрөгийн үнийн дүн захиалгыг 35.5%-иар хувь тэнцүүлэн нийлүүлэхээр хуваарилахаар боллоо. 

СЗХ-ноос анхдагч зах зээлийн арилжааг амжилттай болсон гэж шийдвэр гаргасан үед хөрөнгө оруулагч нар үнэт цаас авч чадаагүй үлдсэн мөнгөн хөрөнгийн буцаан авах эрх үүсэх юм.

МОНГОЛЫН ХӨРӨНГИЙН БИРЖ