2013 оны 5 дугаар сарын 16-ны өдрийн УИХ-ын хаврын чуулганы нэгдсэн хуралдаанаар “Үнэт цаасны зах зээлийн тухай” /Шинэчилсэн найруулга/ хуулийн төслийн анхны хэлэлцүүлэг амжилттай боллоо. 

    УИХ-ын нэгдсэн чуулган дээр “Үнэт цаасны зах зээлийн тухай” хуулийн төслийн талаар хэлэлцэж гарсан санал дүгнэлт, зарим өөрчлөлтүүд зэргийг Эдийн засгийн байнгын хороо болон бусад байнгын хорооны хурлаар хэлэлцүүлэн УИХ-ын чуулганы 2 дугаар хэлэлцүүлэгт бэлтгүүлэхээр болсон байна.

    Уг хуулийн төсөл нь Монголын үнэт цаасны зах зээлийг олон улсад хүлээн зөвшөөрөгдсөн нийтлэг хэм хэмжээнд нийцүүлэх чухал баримт бичиг болох бөгөөд үнэт цаасны давхар бүртгэл, үнэт цаас гаргах ажиллагаа (IPO)-ны нарийвчилсан зохицуулалт, үнэт цаасны зах зээлд явуулах мэргэжлийн ажил үйлчилгээний нарийвчилсан зохицуулалт, үнэт цаасны төлбөр, тооцооны дараа төлбөрт систем, үнэт цаас гаргагчийн үүргийн хэрэгжилт, сайн засаглалыг хэрэгжүүлэх механизм, опцион, фьючерсийн гэрээ, хөрвөх үнэт цаас, үүсмэл санхүүгийн хэрэгсэл болон хадгаламжийн бичиг, кастодианы үйл ажиллагааны талаар зохицуулалтуудыг агуулж байгаагаараа дотоодын зах зээлийг олон улсын жишигт нийцүүлэн тэлж хөгжүүлэх, улмаар улс орны эдийн засагт эергээр нөлөөлөх нөхцөл боломжийг олгох онцгой ач холбогдолтой юм. 

Мэдээллийн алба 

МОНГОЛЫН ХӨРӨНГИЙН БИРЖ