Эрхэм хүндэт азай буурлууд, ахмад настнууд, хөрөнгийн зах зээлийн нийт ажилтан, мэргэжилтнүүддээ XVII жарны “Тийн унжлагат” хэмээх шороон НОХОЙ жилийн мэндийг дэвшүүлье!
Улиран өнгөрч буй тахиа жил нь Монголын хөрөнгийн зах зээлийн хувьд өндөр бүтээлийн жил байлаа. “Монголын хөрөнгийн бирж” ТӨХК дээр үүсгэн байгуулагдсанаас хойшхи 26-н жилийн түүхэнд анх удаа 859,2 тэрбум төгрөгийн арилжаа хийгдсэн бол ТОП20 индекс 68.9 хувиар өсч дэлхийн индексүүдийг өсөлтөөрөө тэргүүлсэн жил байлаа. 2018 он гарсаар “ЛэндМН ББСБ” ХК-ийн үнэт цаасны бүртгэгдсэнээс гадна хэд хэдэн компани үнэт цаасаа шинээр болон давхар бүртгүүлэх хүсэлтээ илэрхийлээд байгаа нь нохой жилдээ хөрөнгийн зах зээлийн нийт хамт олны ажил үйлс өөдрөг өнгөтэй байхын илтгэл гэж билэгшээж байна.
Та бүхэн сар шинэдээ
Төрлөөрөө түвшин амгалан
Элгээрээ энх амгалан
Төр улсаараа элбэг дэлбэг
Төрөл садан хотлоороо сайхан шинэлээрэй!
МОНГОЛЫН ХӨРӨНГИЙН БИРЖИЙН ГҮЙЦЭТГЭХ ЗАХИРАЛ Х.АЛТАЙ