Монголын хөрөнгийн биржийн гүйцэтгэх захирлын үүрэг Гүйцэтгэгч Х.Алтайд Лондонгийн хөрөнгийн бирж группийн Гүйцэтгэх захирал Хавиер Ролет энэхүү албанд дахин томилогдсонтой холбогдуулан баярын захидал ирүүлсэн байна.

Баярын захидалдаа Х.Алтайг 2011-2013 оны хооронд МХБ-ийг удирдан ажиллаж байхдаа Хөрөнгийн зах зээлийн үндсэн дэд бүтэц болох “Миллениум Ай Ти” системийг амжилттай нэвтрүүлж, олон улсын жишигт нийцүүлэн хөгжүүлэхэд шаардлагатай чухал ажлуудыг хийснийг нь онцлон дурьдаад цаашид хамтран ажиллахад таатай байх болно гэдгээ илэрхийллээ.

Дашрамд дурдахад Монголын хөрөнгийн бирж нь Лондонгийн хөрөнгийн бирж групптэй хамтран ажиллах гэрээг 2011 онд 3 жилээр байгуулж, 2014 онд 3 жилээр дахин сунгасан юм. Тус гэрээний хүрээнд  Монголын хөрөнгийн зах зээлийн дэд бүтцийн шинэчлэл, эрх зүйн зохицуулалтыг боловсронгуй болгож хууль, дүрэм, журмыг шинэчлэн найруулах болон биржийн засаглал, бүтэц зохион байгуулалтыг сайжруулах тал дээр амжилттай хамтран ажиллаж байна.

МОНГОЛЫН ХӨРӨНГИЙН БИРЖ