Монголын Хөрөнгийн Бирж /МХБ/ Лондонгийн ХөрөнгийнБирж /ЛХБ/-тэй хамтран ажиллах талаар “Ажлын мастер гэрээ”-нд өчигдөр гарын үсэг зурсан билээ. Энэхүү гэрээний хүрээнд Лондонгийн хөрөнгийн биржтэй хамтран ажилласнаар үнэт цаасны арилжаа явуулах орчин үеийн цогц системийг нэвтрүүлж, эрх зүйн орчин, дэд бүтэц, технологи, боловсон хүчний чадавхи олон улсын стандартад хүрэх юм. Түүнчлэн гадаад дотоодын хөрөнгө оруулагчид орон зай, цаг хугацаанаас үл хамааран Монголын хөрөнгийн биржийн өндөр хурдны платформд холбогдож, арилжаанд хямд өртгөөр, урт хугацаанд, үр ашигтай оролцон, хөрөнгийн захаас бодит өгөөж хүртэх боломж бүрдэнэ. Хоёр биржийн хамтран хэрэгжүүлэх төслийн нийт өртөг болох 14,2 сая долларыг арилжааны банкуудын зээлээр санхүүжүүлэх бөгөөд 3 жилийн хугацаанд улсын төсвийн хөрөнгөөр буцаан төлөгдөх нөхцөлтэй юм. Дээрх санхүүжилтийг Худалдаа хөгжлийн банк, Голомт банк, ХААН банк, Улаанбаатар хотын банк, Хас банк, Төрийн банкууд хамтран анх удаа синдикат хэлбэрээр олгож байгаа бөгөөд дээрх банкууд болон МХБ, ТӨХ-ны удирдлагууд “Хамтын санхүүжилтийн гэрээ”-нд өнөөдөр гарын үсэг зурлаа.