“Монголын хөрөнгийн бирж” ХК нь өнөөдөр буюу 2026 оны 8 дугаар сарын 6-ны өдөр “Хөрөнгийн зах зээлийн хөрвөх чадварыг нэмэгдүүлэх тусгай хөтөлбөр”-ийн хүрээнд Монголын хөрөнгийн биржид шинээр бүртгэгдсэн "Фьючер Тек Инновэйшн" хөрөнгө оруулалтын сангийн (ETF) анхны бүртгэлтэй зах зээл үүсгэгчээр "Апекс Капитал ҮЦК" ХХК-г  бүртгэж, хамтран ажиллах гэрээ байгууллаа.

Гэрээнд “Монголын хөрөнгийн бирж” ХК-ийн Гүйцэтгэх захирлын үүргийг түр орлон гүйцэтгэгч Д.Мөнхбат болон “Апекс Капитал ҮЦК” ХХК-ийн Гүйцэтгэх захирал Б.Лхамдолгор нар гарын үсэг зурж баталгаажуулсан юм.

“Апекс Капитал ҮЦК” ХХК нь хөрөнгийн зах зээлийн идэвхтэй оролцогч бөгөөд энэхүү шинэ бүтээгдэхүүнийг худалдах, худалдан авах үүрэг гүйцэтгэхээр зах зээл үүсгэгчдийн жагсаалтад албан ёсоор бүртгэгдлээ.

Тусгай хөтөлбөрийн хүрээнд зах зээл үүсгэгчийн тогтолцоог хөгжүүлэхээс гадна үнэт цаас зээлэх, зээлдүүлэх орчныг бүрдүүлэх, арилжааны өртгийг бууруулах, шинэ бүтээгдэхүүн, индекс, үйлчилгээ нэвтрүүлэх, өгөгдөл болон мэдээллийн ил тод байдлыг сайжруулах зэрэг цогц арга хэмжээг хэрэгжүүлэх юм.

Цаашид зах зээлийн оролцогч талуудтай хамтран хөрвөх чадварыг нэмэгдүүлэх бодлогын шинэчлэлүүдийг үе шаттайгаар хэрэгжүүлж, Монголын хөрөнгийн зах зээлийг илүү идэвхтэй, ил тод, хөрөнгө оруулагчдад хүртээмжтэй болгон хөгжүүлэхэд чиглэн ажиллах болно.

МОНГОЛЫН ХӨРӨНГИЙН БИРЖ