Монголын хөрөнгийн биржийн Гүйцэтгэх захирал Х.Алтай Сингапурын хамтын ажиллагааны байгууллагын Хойд Ази болон Ойрх Дорнодын бүс нутаг хариуцсан газрын захирал, ноён Тан По Текийг хүлээн авч уулзлаа.
Уулзалтын үеэр талууд Монголын хөрөнгийн зах зээлийн өнөөгийн нөхцөл байдал болон цаашдын чиг хандлагын талаар мэдээлэл солилцсон төдийгүй Монгол Улсад хуримтлалын нэгдсэн сангийн тогтолцоог бий болгох, хөрөнгийн зах зээлээр дамжуулан тэтгэврийн тогтолцоог сайжруулах зэрэг асуудлаар санал солилцож, байр сууриа илэрхийлсэн юм.
Сингапур улс нь Хуримтлалын нэгдсэн сангийн тогтолцоог бий болгож, хөгжүүлсэн туршлагаараа дэлхийд тэргүүлдэг бөгөөд Сингапурын хамтын ажиллагааны байгууллагыг 2006 онд тус улсын Худалдаа аж үйлдвэрийн яам болон Гадаад хэргийн яамны санаачилгаар байгуулж байжээ.
Өдгөө тус байгууллага нь Сингапурын хөгжлийн туршлагыг олон улсад сурталчлан таниулах, хуримтлалын нэгдсэн сан, тэтгэврийн сан болон нийгмийн халамжийн тогтолцооны засаглал, бодлогод тулгарч буй бэрхшээл, хоцрогдлыг үнэлж, тодорхойлох, зөвлөх үйлчилгээ үзүүлэх чиглэлээр олон улсын хэмжээнд үйл ажиллагаа явуулж байна.
МОНГОЛЫН ХӨРӨНГИЙН БИРЖ