Өнөөдөр буюу 2021 оны 9-р сарын 30-ны өдөр Монголын хөрөнгийн бирж дээр Эдийн засгийн сэтгүүлч, судлаачдын клубын сэтгүүлчидтэй "Өглөөний уулзалт"-ыг зохион байгуулж, биржийн удирдлагын зүгээс хөрөнгийн зах зээлийн өнөөгийн байдал, сүүлийн үеийн ахиц дэвшлүүд, цаашид авч хэрэгжүүлэх арга хэмжээ, хөгжлийн боломжийн талаар танилцуулж, чөлөөт ярилцлага өрнүүллээ. 

Аливаа улсын хөрөнгийн зах зээл нь мэдээ, мэдээлэлд үндэслэн өсч, буурдаг онцлогтой бөгөөд хөрөнгө оруулагчдад зах зээлийн үнэн, бодит мэдээ, мэдээллийг түргэн шуурхай хүргэх асуудал нь зах зээлийн ил тод байдлыг сайжруулахад чухал ач холбогдолтой юм. Сүүлийн жилүүдэд хөрөнгийн зах зээлд шинэ бүтээгдэхүүн үйлчилгээ нэвтэрч, арилжаа, зах зээлийн үнэлгээ, ТОП 20 индекс зэрэг голлох үзүүлэлтүүд түүхэн дээд хэмжээнд хүрч, зах зээл идэвхжихийн хирээр хөрөнгийн зах зээлийн талаарх олон нийтийн мэдлэг, мэдээллийг сайжруулах хэрэгцээ шаардлага тулгамдаж байгааг харгалзан өнөөдрийн энэхүү уулзалтаар зах зээлийн талаарх мэдээ, мэдээллийг илүү цар хүрээтэйгээр түгээх, мэдээллийн төрлийг нэмэгдүүлэх чиглэлээр хамтын ажиллагаагаа улам өргөжүүлэхээр ярилцлаа. 

МОНГОЛЫН ХӨРӨНГИЙН БИРЖ